Puisi-puisi Indik Gunung Agung Olih IBW Widiasa Kenitén; Tolangkir
 |
| Potrekan Olih Wayan Paing |
Pinanggal
22 Séptémber 2017
jroning weteng Tolangkir
ngabar-ngabar geni sabwana
sayaga membah nujah kawah
ngrudug jana amlanagantun
tan pasantun pati santul
marga ageng kanten cupek
honda mobil pakruek
pati kipek
ngrastiti mangda selamet
Éling warsa 1963
guminé manadi lahar
blabar gni ngabar-abar
kayu alas pungkat balbal
idup tegik pati pikpik
oteng makrimik ngumik
séket patpat kaliwat
paliaté sawat
marawat-rawat geguat.
Ngungsi
1
boya umah padidi
membah nyama braya
balé banjar umah krama
dunungan sentana
salunglung sabayantaka.
Ngungsi
2
tulung tinulung
ngulati luung
adung
Gunung
Agung
linggan bumi bali
nyujur akasa sepi
mayoni batur mili
Tri Purusha sakti
Putran Hyang Pasupati
Hyang Putranjaya
Hyang Agni Jaya
Hyang Dhanu ening
enteg tegteg pratiwi
ménggang-ménggung bumi bali
manadi santhi
trepti.
Basuki-Anantabhoga
Basuki Anantabhoga
ngider mandala bali
ngrastiti santhi
ngurip ati
utami
Besakih
linggih déwa-déwi
ngemit bumi bali
amertha utami
kapti jana bali
masesari
Tolangkir
1
Siwaning mandala bali
suciang sanunggil ati
tegteg tapasui
gni jroning garbi
murub ngulati margi
pratiwi bali.
Padma
Tiga
Padma Tiga
nunggalang idep
nyikiang kayun
nangun budhi santhi
swaran amubu
nglayang ngisep
sarining manah
matangguran sapta sunya
mateja sapta windhu
amertha sapta tirtha
bhur bwah swah
nunggal
Tolangkir
2
ri pada Hyang Tolangkir
amekul citta budhi
nyuaraang Ong Sembah
Ongkara Gni Sabwana
mungkah lawang
tapaswi nyunya
marganing sepi
ning
IBW Widiasa Kenitén embas ring Geria Gelumpang, Karangasem, 20 Januari 1967. Oneng ring sastra Bali klasik, sastra Bali modéren taler sastra Indonésia. Kakawian idané kawedar ring Bali Post, Buratwangi, Mémorandum, Warta Bali, Bali Aga, Majalah Sinar Agung, Majalah Éksprési, Bali Tribun, Pos Bali. Ngamolihang Hadiah Sastra Rancagé ring warsa 2006 antuk pupulan satua cutet Buduh Nglawang. Ring warsa 2015 ida ngamolihang Penghargaan Widya Pataka antuk cakepan Jero Lalung Ngutah.
No comments