Puisi-Puisi I Gdé Nala Antara; Yu Gék

Gagambaran Olih Manik Sudra

Sokasi

Jani jaman globalisasi
Né di tengah campuh jak di sisi
Poloné puyung mabet bek misi
Bedik-bedik pragat emosi
Diolas eda bes lebihan aksi
Sukak kupingé ningeh makisi-kisi
Yén basangé tondén misi
Mai ngungsi ka pasisi ngalih nasi
Gaya bantas mara bisa nyuun sokasi
Gaya bantas mara bisa nganggo dasi
Gaya bantas mara bisa cara polisi
Mirib yén maan posisi né bergengsi
Sing buungan kolusi terus korupsi
Stréss sing maan grasi
Pamuput makrémasi.

Dps, 12/07/2015


Yu Gék

Tiang suba rumasa ring déwék
Tiwas nékték ngangonang bébék
Ulian bedak tiang nuléngék
Di betén maguyang ngaséksék
Doh para lakar nyujuh menék
Ngrérék bintang kenehé rémék
Makejang anaké pada ngwalék
Makejang anaké kedék ngécék
Bes makelo tiang ngajap Yu Gék
Makules kanti dadi régék
Depang tiang dini nylekéték
Masepék cara kedis téngkék
Magocék di kalangané bécék.


Dps, 21/06/2017



I Gdé Nala Antara
wantah dosén ring Fakultas Ilmu Budaya, UNUD.

No comments