Prosa Liris Ngakan Madé Kasub Sidan; Nyelang Kalangan

Gagambaran Olih Putra Ariawan

Tabuh Rah

I/Panyapa

Yadnya bébék putih jambul/ miber genah kalér kangin/ ngareresik dasa mala/ sor akasa duur pertiwi/ nglikub bayu apah téja/ yumiratang sunya resik/ ring ginati tembangnyané.

II/Panglintih

Duh Hyang, matedoh tiding nyakupang nunggilang manah, durus najeg ngentér ring siwa dwara. Mangda sida netesang sapangrauh catur bhuta. Lampahé sida masahang butha anggapati saking butha mrajapati, banaspati, lan banaspati raja. Saking Ning ngawi Ning titiang sida ngedat. Hyang, pasahang kabyahparan  sané kalikub buta bendu agung karaksasan antuk japa mantra, nasi a kepel maulam bawang jahé. Hyang, tujuhin ja titiang kandha pat panyaman titiang sané durung sida tatas antuk titiang genahnyané.

III/Panyengker

Om durga patuh bhuta patuh kala patuh dengen patuh  léak patuh sing masyung pada patuh. Patuh patuh patuh.

  

Nyelang Kalangan

(Katur ring: Sang Momo Angkara,Duratmaka)

Suling sunari sané miber prasida ngiter akasa gumanti wit metu saking siwa dwara. Tabuh gagambelan sampun andel ring gambelannyané suang-suang. Giing ugal ngaruruhang sasuluh margi. Petuk nuut mangda pamargine anut. Gedigan kendang masangsih cecepolan céngcéng sahasa nimpalin candet réong. Gong sapisan, sapisan tetabuhan janggel, tan pa suara. Arangsukan panganggo pragina sampun karangsuk. Stéwel akit ngiket cokor ngawi tandang tangkep mangda sida lampah lumampah kadi tanjek tabuh. Wastra angkeb raga ngardi sané tan wenang cingakin tan kacingak sang mapanyingakan jalir, ngulurin momo. Kampuh lan awir ngawinang dada tan makanten nanging kakantenang asri, alep alus. Badong sumringah maka depdep, pakanyohnyoh gumanti nudut nuut sunari ampehang 4itian masikian ring tembang macapat pragina, tan lémpas ring lelintihan carita. Gelungan, gelang kana, lan panyangkepnyané nyakepin patitis sregep paripurna sayaga nangkepin pangantos tetabuhan. Nanging dados maéndahan tapel kaanggen itiané prerai? Dados langsé durung katanjebang, napiké sangkaning pangresikan durung resik? Dados kalangan durung kagelar napi tan kelingan malih yadiastun carun kalangan sampun kagelar? Rarisang saur ninaurin mangkin mangda tan kasép, mangda beriuk sapanggul! Nyelang kalangan genah ngetohang nyolahang sesolahan. Titiang nyantos. Jantos itian. Tan ajerih. Tan makirig atampak!

Ngakan Madé Kasub Sidan
embas ring désa Satra Klungkung nemonin Saraswati warsa 1959. Ngawit warsa 1982 ngunggahang reriptayan marupa: puisi, cerpén, artikel, sekar alit, lan éssai ring Bali Post, Nusa Tenggara, Karya Bhakti, Satwa, Canang Sari, tur nglimbak ring Anita Cemerlang lan Zaman (Jakarta), Mimbar Masyarakat (Samarinda). Ngamolihang makudang-kudang jayanti, lan penghargaan sekadi anugerah “Widya Kusuma” (Tokoh Pendidikan Bali ) saking Gubernur Bali warsa 2010. Sané mangkin, ngayah dados pengawas SD/MI Kecamatan Klungkung.