Sampian Emas

Olih: I Gdé Nala Antara
Gagambaran Olih I Ketut Budiana

Kajeng Kliwon Enyitan sandé kawon ring tunon
Mawuwuh Sasih Désta ngawi dusta dados désti
Wenginé sayan sepet wastra cendet sada kabet
Gapul mapupul ngelur ngelar aji tungkul jaka tunggul
Suku tunggal pudak sategal makramas sampian emas
Léak lanang maningkang
Léak wadon manonton
Léak barak ngakak-akak
Léak selem kenyem-kenyem
Léak kuning makenying manying
Léak putih mangaras silih asih
Sami mapinton 
sami masuryak
sami magisep 
sami ngrerengih
Dedet sayan kampih
Malayar tan pakantih
Mulih tan pasundih
Ajerih saling dalih.

Seraya, Sasih Désta 2015.



NB: Puisi sané mamurda “Sampian Emas” kakawian I Gdé Nala Antara puniki naanin kamuat ring rubrik Médiaswari (Pos Bali), rahina Redité Pon, 3 April 2016.

No comments